ВЫКАНАЎЧЫ КАМІТЭТ
11 лістапада, Мінск /Кар. БЕЛТА/. Тэму росту зарплат у 2025 годзе пракаменціраваў міністр фінансаў Юрый Селіверстаў у інтэрв'ю тэлеканалу "Беларусь 1", паведамляе БЕЛТА.
На пытанне, ці варта разлічваць на рост зарплат у 2025 годзе, Юрый Селіверстаў адказаў: "Зразумела, варта. Тут два блокі. Першы - гэта рост базавай стаўкі. Рашэнне ўрада прынята ўжо. Базавая стаўка для бюджэтнікаў з 1 студзеня - Br270. А другі блок - гэта галіновыя надбаўкі, якія дадуць магчымасць выканаць тыя параметры, якія закладзены ў праграму сацыяльна-эканамічнага развіцця".
Так, сярэдняя зарплата ўрачоў павінна скласці 150 працэнтаў да сярэдняй па эканоміцы, настаўнікаў - 100 працэнтаў. "Ахова здароўя практычна выйшла на ўзровень 150 працэнтаў. Зразумела, што зарплата ў эканоміцы расце і гэтыя суадносіны зніжаюцца. Каб іх падтрымаць, амаль Br180 млн дадаткова прадугледжана на павелічэнне такіх надбавак", - адзначыў міністр.
"Прыярытэт у галіновых сродках на заработную плату - гэта педагогі. Больш за Br500 млн прадугледжана для выканання задачы, каб зарплата педагогаў была не меншай за 100 працэнтаў да сярэдняй па эканоміцы. Таксама прадугледжаны дадатковыя надбаўкі для ўстаноў сацабслугоўвання, для работнікаў фізкультуры і спорту, культуры", - праінфармаваў кіраўнік Мінфіна.
Ён адзначыў, што пры фарміраванні праекта бюджэту на 2025 год сацыяльная палітыка была ў прыярытэце. "Гэта не толькі расходы на выплату заработнай платы, гэта расходы, звязаныя з усім сацыяльным блокам. Гэта і ўтрыманне ўстаноў, і набыццё лякарстваў, і камунальныя плацяжы, і прадукты харчавання для ўстаноў адукацыі, устаноў сацыяльнага абслугоўвання і многія іншыя расходы. Прыярытэт і дарожнай гаспадарцы - калі скласці ўсе крыніцы, атрымаецца амаль Br3 млрд. Вялікі аб'ём сродкаў выдзяляецца ў тым ліку на мясцовыя дарогі", - сказаў Юрый Селіверстаў.
Яшчэ адзін прыярытэт - падтрымка прамысловасці, сельскай гаспадаркі. "Зразумела, павінен быць імпульс у гэтым напрамку, каб быў вынік. Павінны быць сучасныя тэхналогіі, абсталяванне. Павінна быць патанненне тых рэсурсаў, якія пойдуць на абнаўленне асноўных сродкаў", - падкрэсліў міністр.