Гомельскі аблдрамтэатр рыхтуе прэм'еру "Палявання на качак" - смешнай гісторыі пра нясмешнага чалавека

17 лютага, Гомель /Кар. БЕЛТА/. Гомельскі абласны драматычны тэатр рыхтуе прэм'еру спектакля "Паляванне на качак" паводле аднайменнай п'есы Аляксандра Вампілава, паведамілі БЕЛТА ў тэатры.

Жанр спектакля рэжысёр-пастаноўшчык Вацлаў Дамбоўскі (Санкт-Пецярбург) абазначыў як "смешная гісторыя пра нясмешнага чалавека".

"Паляванне на качак для галоўнага героя спектакля Віктара Зілава - сімвал шчаслівага жыцця, дзе дыхаецца на поўныя грудзі, дзе навакольны свет, як у дзяцінстве, расквечаны яркімі фарбамі і гукамі, дзе каханне - не проста збітае слова, а абазначэнне высокіх і высакародных пачуццяў", - расказалі ў тэатры.

Ці зможа галоўны герой вырвацца з замкнутага круга штодзённасці, раўнадушнасці і няшчырасці? Гледачы ўбачаць адзін дзень з жыцця героя, дапоўнены яго ўспамінамі, максімальна насычаны смешнымі і драматычнымі падзеямі, і вырашаць, ці застаюцца ў Зілава права і надзея на шчасце.

Прэм'ерныя паказы спектакля запланаваны на 5, 7, 22 сакавіка.-0-