"Па кожнай пазіцыі сур'ёзны рост". Багданаў аб продажах беларускай агародніны і садавіны на ўнутраным рынку

9 кастрычніка, Гомельскі раён /Кар. БЕЛТА/. Продажы беларускай агародніны на ўнутраным рынку значна выраслі. На гэта звярнуў увагу міністр антыманапольнага рэгулявання і гандлю Аляксей Багданаў у час рабочай сустрэчы з гандлёвымі сеткамі і вытворцамі плодаагародніннай прадукцыі па забеспячэнні яе ўнутранага спажывецкага рынку. Сустрэча праходзіць на базе КСУП "Брылёва" Гомельскага раёна, перадае карэспандэнт БЕЛТА.

"Мы паспяхова выконваем пастаўленую кіраўніком дзяржавы задачу забяспечыць пад поўную патрэбнасць унутраны рынак краіны ў міжсезонны перыяд нашай айчыннай плодаагародніннай прадукцыяй. У нас як за мінулы год, так і за бягучы перыяд (гэтага года. - Заўвага БЕЛТА) значна выраслі продажы беларускай агародніны. Гэта адзначана і ў даных статыстыкі, і ў справаздачах гандлёвых арганізацый", - падкрэсліў міністр.

"Па выніках работы за мінулы год і за бягучы перыяд 2024 года продажы беларускіх яблыкаў павялічыліся на 30 працэнтаў, агародніны ў цэлым на 12,5 працэнта. Капусты - на 5 працэнтаў, морквы - на 10 працэнтаў, цыбулі - на 26 працэнтаў і гэтак далей. Па кожнай пазіцыі ў нас сур'ёзны рост", - агучыў даныя кіраўнік ведамства.

Таксама вырасла доля беларускай агародніны ў агульнай карзіне тавараў, якія прадаюцца. Акрамя таго, скараціўся імпарт. "Мы арыентуем гандлёвыя арганізацыі на тое, каб яны максімальна працавалі з нашымі вытворцамі. Гэта датычыцца ўсіх тавараў", - дадаў Аляксей Багданаў.

Ён звярнуў увагу, што ўнутраны беларускі рынак забяспечаны па многіх групах харчовай індустрыі сваімі таварамі. І калі раней айчынныя сельгасвытворцы, фермеры, вырошчваючы прадукцыю, арыентаваліся на пастаўкі на экспарт, а гандаль - на імпарт, то цяпер сітуацыя карэнным чынам змянілася.

Аляксей Багданаў нагадаў, што, напрыклад, па яблыку, Прэзідэнт, наведваючы фермерскую гаспадарку пад Маладзечнам, якая спецыялізуецца на пладаводстве, падкрэсліў, што Беларусь павінна поўнасцю забяспечваць сябе пладамі ўласнай вытворчасці. "Гэта глабальная задача не толькі на міжсезонны перыяд, але і ў цэлым у гадавым цыкле - максімальна сябе забяспечваць плодаагародніннай прадукцыяй і зялёнымі культурамі. Для гэтага неабходна правесці шэраг мерапрыемстваў", - звярнуў увагу міністр.

Што датычыцца яблычнага комплексу, то гэта дзве асноўныя тэмы, удакладніў ён. "Гэта будаўніцтва сховішчаў, якія далі б магчымасць захаваць яблыкі да канца міжсезоннага перыяду або да пачатку наступнага сезона. А да гэтага неабходна правільнае вырошчванне тых сартоў, якія можна захоўваць", - сказаў Аляксей Багданаў.

Ён звярнуў увагу, што Міністэрства сельскай гаспадаркі працуе ў гэтым напрамку.

Акрамя таго, для вырошчвання зялёных культур, таматаў, цяплічнай агародніны ў закрытым грунце было прынята рашэнне ў мінулым годзе па льгатаванні цаны на электраэнергію для гаспадарак, якія працуюць у гэтым напрамку, адзначыў міністр. "Сёння такіх гаспадарак у нас ужо больш за 10, якія карыстаюцца гэтай ільготай і пастаўляюць вырашчаную прадукцыю на ўнутраны рынак", - удакладніў Аляксей Багданаў.