Рэспубліканскі кірмаш вакансій для пажылых і інвалідаў пройдзе 25-29 лістапада ў Беларусі

25 лістапада, Мінск /Кар. БЕЛТА/. Агульнарэспубліканскі кірмаш вакансій для пажылых і інвалідаў пройдзе 25-29 лістапада ва ўсіх рэгіёнах Беларусі, паведамляе БЕЛТА са спасылкай на Міністэрства працы і сацыяльнай абароны.

У кірмашы вакансій прымуць удзел амаль 1,2 тыс. наймальнікаў розных сфер дзейнасці, якія прадставяць, паводле папярэдніх даных, каля 19 тыс. свабодных рабочых месцаў.

На мерапрыемства запрашаюць тры катэгорыі грамадзян: пенсійнага і перадпенсійнага ўзросту, а таксама інвалідаў. Яны змогуць прайсці гутарку з работадаўцамі, атрымаць кансультацыі па садзейнічанні ў працаўладкаванні, па пытаннях пенсійнага і працоўнага заканадаўства.

Удзельнікамі мерапрыемства стануць вядучыя прадпрыемствы ў розных сферах: прамысловасці, гандлю і паслуг, аховы здароўя, лясной і сельскай гаспадаркі і інш. Сярод іх ААТ "Нафтан", ЗАТ "Атлант", СЗАТ "БЕЛДЖЫ".